Eva Laufey í nám á Bifröst

Eva Laufey Kjaran Hermannsdóttir umsjónarmaður þáttarins Matargleði Evu á Stöð 2 er búin að skrá sig í nám á Bifröst. Þegar ég hafði samband við hana sagðist hún vera mjög spennt fyrir náminu. 

„Í nokkur ár hef ég haldið úti matarbloggi mínu, gefið út matreiðslubók og uppskriftir í bæklinga, ásamt því að starfa hjá stöð 2 við dagskrárgerð. Með þættina mína Matargleði og við innslagagerð í Íslandi í dag. Ég skráði mig í viðskipta-og matvælarekstrarfræði á Bifröst,“ segir Eva Laufey Kjaran Hermannsdóttir sem mun stunda fjarnám við skólann í vetur samhliða vinnu sinni á Stöð 2.

„Námið býður upp á marga spennandi möguleika, en aðallega langar mig að byggja ofan á þá þekkingu sem ég hef aflað mér undanfarin ár. Ég get sameinað áhugamálið mitt, sem er matargerð, og viðskiptafræði, sem veitir mér þann möguleika að öðlast þá þekkingu sem til þarf að hefja sinn eigin rekstur. Hver sem hann nú verður. Ég er með margar hugmyndir í kollinum og þetta er skrefið í þá átt,“ segir Eva Laufey. 

• Blogga um frétt