Það er ekki aðeins hér á landi sem sumir eru óánægðir með ráðamenn þjóðarinnar. Steven Joyce, fjármálaráðherra Nýja-Sjálands, komst heldur betur í hann krappan á dögunum þegar ungur kjósandi þar í landi ákvað að sýna óánægju sína í verki vegna einhvers viðskiptasamnings.
Viðkomandi tók sig til og fleygði gervilim af öllu afli í andlit ráðherrans og sýndi með þeim hætti að henni stæði ekki á sama um framgöngu ráðherrans. Ráðherrann tók þessu af stóískri ró enda grjótharður. Ekki fylgir sögunni hvort mótmælandinn hafi verið handtekinn og gerður að tugthúslim.