Nanna Kristín Magnúsdóttir, leikkona og framleiðandi, og unnusti hennar, Gautur Sturluson lögfræðingur, eignuðust dreng 3. október síðastliðinn. Móður og barni heilsast vel.
Nanna Kristín vakti athygli á dögunum þegar hún birtist á nakin á forsíðu MAN. Í forsíðuviðtalinu sagði Nanna Kristín frá því hvernig þau Gautur hefðu hnotið um hvort annað og það hefði aldrei gerst ef þau hefðu verið að drekka.
„Sjálfstraustið var brotið og ég gat ekki hugsað mér að hleypa neinum að mér aftur,“ segir Nanna Kristín meðal annars um líðan sína eftir skilnað. „Ég var ekki á leiðinni í annað samband en svo gerðist það alveg ótrúlega fljótt. Sameiginleg vinkona okkar Gauts fór að benda okkur á hvort annað og athuga hvort við hefðum ekki áhuga á að spjalla saman sem við svo gerðum í gegnum Facebook í heilan mánuð áður en við hittumst í fyrsta sinn. Ég var mjög treg til í fyrstu en samþykkti að fá mér kaffi með honum. Fyrsti fundurinn var svo þannig að við sátum og töluðum í fjóra tíma eða þar til okkur var hálfpartinn hent út af kaffihúsinu,“ segir Nanna Kristín í viðtalinu við MAN.
Það krúttlega er að snáðinn gat ekki beðið eftir að koma í heiminn og þegar MAN kom út 5. október var hann orðinn tveggja daga gamall. Svona eru örlögin stundum.