Katrín Middleton, hertogaynja af Cambridge, fer reglulega í hinar ýmsu opinberu heimsóknir. Í þessum heimsóknum fær hún reglulega blómvönd að gjöf, enda vilja flestir taka vel á móti sjálfri eiginkonu prinsins.

Katrín hefur sagt frá því að fjölskylda hennar geri reglulega grín að henni fyrir að vera of kumpánaleg við fólkið sem hún hittir í heimsóknum sínum, og þykir hún spjalla helst til lengi. Þá slær hún aldrei hendi á móti blómvendi, eða tveimur.

En hvað verður um alla þessa ótalmörgu blómvendi? Samkvæmt frétt Popsugar réttir hertogaynjan starfsfólki sínu jafnan blómin, sem oftsinnis kemur þeim áleiðis til góðgerðarstofnana og kirkna. Eflaust rata síðan örfáir vendir heim í vasa.