Plebbaskapur og flottræfilsháttur var ekki að þvælast fyrir Guðna Th. Jóhannessyni á námsárum hans í Lundúnum. Guðmundur Steingrímsson fyrrverandi þingmaður fann gamalt nafnspjald sem Guðni rétti honum á námsárum þeirra í Lundúnum árið 2000. Guðni var ekki með sérprentuð nafnspjöld heldur heimagerð.
„Undir aldamótin, þegar ég var í námi í Bretlandi rakst ég á gamlan nágranna á förnum vegi. Hann var líka að læra í Bretlandi. Við röbbuðum að sjálfsögðu saman eins og ætíð. Hann lét mig hafa nafnspjaldið sitt. Núna sautján árum síðar er ég að taka upp úr kössum og raða í skrifborðsskúffur, eins og gengur. Fann þá þetta nafnspjald. Það er hógvært, heimatilbúið og laust við allt prjál og uppgerð, eins og Guðni Th Jóhannesson einmitt er,“ segir Guðmundur Steingrímsson fyrrverandi þingmaður.