Fjárfestirinn Björgólfur Thor Björgólfsson eyddi sunnudeginum á ströndinni með knattspyrnustjörnunni David Beckham og fjölskyldu hans.
Daily Mail birti myndir af strandarferð knattspyrnukappans. Breski fréttamiðillinn nafngreinir ekki Björgólf en lýsir honum sem silfurref. Miðað við myndirnar virðast þeir félagar vera hinir mestu mátar og Björgólfur hikar ekki við að fara inn á persónulegt svæði Beckhams.
Með á ströndinni voru börn þeirra Victoriu og Davids Beckham, Brooklyn, Romeo, Cruz og dóttirin Harper Seven. Cruz Beckham er einmitt góður vinur Daníels Darra en hann er sonur Björgólfs og Kristínar Ólafsdóttur. Svo gera má ráð fyrir að hann hafi verið í för með Björgólfi föður sínum.
Victoria Beckham birti mynd í síðustu viku af þeim Daníel Darra og Cruz þar sem þeir slökuðu á við sundlaugarbakkann.