Ofurfyrirsætan Karolina Kurkova var grönn og í góðu líkamlegu formi þegar hún hóf feril sinn sem fyrirsæta og því hélt hún að henni væru allir vegir færir. En það var ekki alveg svo einfalt því á umboðsskrifstofunni sem hún leitaði til þótti hún alls ekki nógu mjó og var því vinsamlegast beðin um að fara í megrun.

Tékknesku fyrirsætunni var boðið að taka þátt í panelumræðu bandarískra fatahönnuða á dögunum og ræddi þar eigin sjálfsmynd og harðan heim tískunnar, að því er fram kemur í þýska blaðinu Bunte. Sagðist hún hafa verið ánægð með útlitið þegar hún freistaði gæfunnar sem fyrirsæta og sótti um hjá stórri umboðsskrifstofu. Hún var hins vegar send aftur heim og sagt að grenna sig.