Victoria Beckham á tískuvikunni í New York
Victoria Beckham sýndi góða takta á tískuvikunni í New York í gær þar sem haustlína hennar 2012 var frumsýnd. Það er nettur stríðsárabragur á línunni. Lögð er aðaláhersla á mittislínuna sem þýðir bara eitt. Þær sem ætla að klæðast samskonar kjólum í haust verða að vera öflugar í plankaæfingunum og styrkja miðjuna.
Fötin í línu Beckham eru ákaflega vel sniðin og falleg. Þau sýna vel kvenlegar línur sem eru svo heillandi. Hún tók hermannaklossana og færði þá upp á annað plan á tískusýningunni. Auk þess notaði hún ökklaskó á sjarmerandi hátt. Það er vandasamt að vera í ökklaskóm við kjól því það styttir fótlegginn, en með því að fara í hnésokka undir lengist fótleggurinn og það gengur betur upp við kjóla og pils.
Fötin voru ekki bara falleg á sýningunni heldur heildarútlitið. Förðunin var látlaus og voru flestar fyrirsæturnar með rauðar varir og lítið máluð augu.
