Fyrirsætan Kolfinna Kristófersdóttir sýndi hausttískuna 2012 fyrir hönnuðinn Marc Jacobs á tískuvikunni í New York.

Marc Jacobs er eitt af aðalnúmerum tískuvikunnar í New York og er mikill heiður að fá að sýna fyrir hann. Kolfinna er þekkt hérlendis en hún hefur verið á samningi hjá Eskimo models. Í fyrra skrifaði hún undir samning við Next, sem er ein stærsta fyrirsætuskrifstofa Bretlands.

Lína herra Jacobs fór vel í áhorfendur. Rauði liturinn er áberandi í bland við svartan og gráan. Mikið er um stríðsáralega kjóla með plíseruðum pilsum og svo virðist sem sokkar séu að koma inn aftur því fyrirsæturnar voru flestar í ökklaskóm og sokkum. Victoria Beckham sýndi einmitt samskonar takta fyrir nokkrum dögum þegar hún kynnti haustlínu sína 2012.