Sigga Heimis hannar skinnlínu fyrir Varma
Iðnhönnuðurinn Sigga Heimis er þekkt fyrir hönnun sína á heimilisvörum. Nú kveður við annan tón því hún er hönnuður nýrrar skinnalínu frá Varma sem státar af veskjum, lúffum, húfum, treflum, vestum auk heimilislínu.
Í heimilislínunni eru púðar, teppi, inniskór, sessur og kollar. Varma er iðnfyrirtæki sem er þekkt fyrir prjónavörur sínar en hefur þó framleitt mokkavörur í fjöldamörg ár. Hönnun, hugvit, framleiðsla og hráefni er íslenskt og unnið af Íslendingum.
Íslenskur skinnaiðnaður hefur eflst undanfarin ár, en ennþá er mest til útflutnings því um 85% af öllum gærum eru fluttar út og meirihlutinn óunninn. Skinnin þykja afbragðsgóð og kaupa mörg nafntoguð tískumerki íslenskar gærur frá Skinnaiðnaði og nota í framleiðslu sína.
Markmið Varma er að auka framleiðslu úr íslensku mokkaskinni m.a. með útflutning í huga. Það liggja töluverð verðmæti í því að vinna þetta skemmtilega hráefni hér á landi og selja úr landi sem fullunna söluvöru. Íslenskar mokkavörur eru mjög hlýjar og ekki vanþörf á slíkum vörum í vetrarhörkum eins og í vetur.
