Ef sumarið er ekki tíminn til að sporta sig um í huggulegum íþróttafötum þá veit ég ekki hvað. Þess vegna er alltaf ánægjulegt þegar íslenskum tískupæjum gefst kostur á fjölbreytni í sportfatnaði og ný merki líta dagsins ljós.
Í morgun var YAS-línan frá Vero Moda kynnt fyrir helstu tískupæjum landins á Nauthóli. Það sem vakti athygli var hvað efnin í sportlínunni eru létt og hugsað er út í hvert smáatriði. Sérstaklega er þess gætt í línunni að fötin andi vel undir höndum og í hnésbótum þar sem kvenpeningurinn á það til að svitna sem mest. Alls konar saumar gera flíkurnar sjarmerandi og eru prentin sérstaklega heillandi. Undir höndum og í hnésbótum er svo annað efni, léttara og hálfgegnsætt, notað til þess að gera fötin ennþá heppilegri í ræktina.
Það sem er mest áberandi í sporttískunni í ár er að vera helst í samlitum fötum. Vera í bláum buxum við bláan topp eða munstruðum buxum við munstraðan topp. Svo má krydda þetta með íþróttabrjóstahöldurum í skærum litum þar sem hlýrarnir fá að gægjast fram á þokkafullan hátt.
Á fimmtudaginn verður opnað nýtt flaggskip Vero Moda í Kringlunni og þar verður þessi nýja og fína sportlína til sölu ásamt öðrum merkjum frá fyrirtækinu. Eins og sést á myndunum eru þessi íþróttaföt algerlega eitthvað til að vinna með.