Fyrirsætan Anna Jia er nýkomin heim eftir ársdvöl í Kína. Í Hong Kong keypti hún sér almennilegt veski og tösku, en hún segir að allar konur þurfi að eiga fallega tösku sem passar við allt og gott veski fyrir fyrir sumarið.
Hefur þú einhvern sérstakan fatastíl? Eins og er, þá er ég á svolitlu breytingaskeiði varðandi fatastílinn minn. Eftir ársdvöl í Kína og gjörbreytt veðurlag hefur hann breyst alveg töluvert og maður þarf svolítið að aðlaga sig veðurfarinu hérna á Íslandi aftur. Annars er ég núna rosalega hrifin af fallegum skyrtum og blússum við buxur og létta jakka eins og leðurjakka eða barbour jakka. Ég er líka með algjört æði fyrir fallegum treflum og klútum.
Ert þú ein af þeim sem eru með fullan skáp af fötum en fara alltaf í það sama? Það var tekin heljarinnar stór tiltekt í skápnum núna þegar ég flutti aftur heim svo nú eru bara flíkur og skór sem ég nota mikið eftir svo ég held ég geti nú bara sagt með góðri samvisku, nei ekki lengur!
Ferð þú með meira af fötum með þér í ferðalög en þú síðan notar? Nei, ég passa alltaf að taka frekar minna en meira svo að það sé alveg nóg pláss fyrir nýja og fína hluti í töskunni án þess að þurfa að troða.
Ferð þú í sítískubúðir? Já, mér finnst alltaf gaman að kíkja í þær og sjá hvort maður rekist ekki á eitthvað sætt. Síðan eins og sannur Íslendingur elskar maður nú alltaf H&M í leyni.
Átt þú þér einhverja uppáhaldsbúð hér eða í útlöndum? Já, hér heima er Geysir alveg uppáhalds, það er alltaf eitthvað á óskalistanum þar en í útlöndum þá eru Mangó, French conection og Monki alltaf í uppáhaldi líka.
Ert þú hvatvís í innkaupum og færð síðan móral á eftir? Ég er komin með góða reglu sem hefur sparað mér ófáa aurana sem er að kaupa ekkert nema ég sé alveg handviss frá byrjun að mig langi að eiga það og sé viss um að ég muni nota. Því oftar sem ég fór að fara eftir reglunni því sjaldnar kom mórallinn. Svo er líka betra að kaupa flík einu sinni aðeins dýrari ef hún er vandaðri því þá er líka lengra notagildi og þá sleppur maður við að þurfa alltaf að kaupa nýtt aftur og aftur sem endar oft á því að vera miklu hærri upphæð.
Kaupir þú flík sem þú ætlar að nota einhvern tímann seinna, en ferð svo aldrei í? Já, það gerist stundum en þá er samt gott að eiga systur og litlar frænkur sem geta vonandi notað flíkina í staðinn.
Ferð þú vel með fötin þín og burstar vel skóna þína? Já, ég myndi segja það. Eftir að hafa unnið í fatabúð í þrjú ár þá er alltaf passað upp á að allt snúi eins á herðatrjánum, vel saman brotið og stundum geng ég meira að segja það langt að litaraða.
Er röð og regla í fataskápnum eða þarft þú að kafa, róta og gramsa til að finna það sem þú ætlar að ná í? Já, sérstaklega núna því það var allt tekið í gegn þegar ég flutti heim. Það er mjög þægilegt að hafa færri hluti í skápnum og meira skipulag svo ég held ég muni reyna að halda mér við þetta skipulag.
Hvað flík finnst þér að allar dömur ættu að fjárfesta í fyrir sumarið? Frekar góðri tösku og veski heldur en flík. Ég keypti mér almennilega tösku og veski í Hong Kong síðasta vetur og hef ekki séð eftir því. Það munar rosalega að hafa alltaf fallega tösku sem passar við allt og gott veski til að halda utan um öll kort og skírteini.