Tískudívan Olivia Palermo skiptir út fáguðum flíkum sem hún klæðist í New York fyrir afslappaðri og svalari föt þegar hún er í London að eigin sögn.
„London er mitt annað heimili. Mér finnst hver og ein borg hafa ólíka fagurfræði og ég klæði mig eftir því, ég er mun fágaðri þegar ég er í New York. Þegar ég er í London þá klæðist ég til dæmis blazer-jakka og strigaskóm og hef hárið örlítið úfið,“ útskýrði Palermo í viðtali fyrir Hello! á dögunum.
„Ég fer reglulega í Topshop, Reiss og Whistles,“ sagði Palermo aðspurð hvaða tískuverslanir væru hennar uppáhalds.
Palermo er mikil áhugamanneskja um skófatnað en nýverið afhjúpaði hún skólínu sem hún hannaði fyrir ítalska merkið Aquazzura, skórnir eru sparilegir og flestir með pinnahæl.