Sænska móðurskipið Lindex er búið að leggja undir sig plássið þar sem Adidasbúðin var áður og ætlar að opna þar 320 fm kvenfatabúð.
Í síðustu viku fagnaði Lindex 60 ára afmæli sínu í Gautaborg með glæsilegri veislu og tískusýningum. Af því tilefni fékk fyrirtækið Jean Paul Gaultier til þess að hanna sérstaka línu fyrir fyrirtækið.
„Við erum nýkomin frá afmælinu í Gautaborg þar sem við fengum frábæran innblástur og innsýn í það sem koma skal í tískunni og erum gríðarlega spennt fyrir að geta gert því skil í Kringlunni með einstökum hætti,“ segir Lóa Dagbjört Kristjánsdóttir, umboðsmaður Lindex á Íslandi.
Verslunarrýmið, sem mun geyma allar kventískulínur Lindex, Holly & Whyte, Contemporary, Everyday, Generous og hina einstöku Lindex Extended, hefur yfir að ráða framhlið og staðsetningu sem á sér vart hliðstæðu með yfir 160 m2 af gluggum sem snúa út í aðalgöngugötu Kringlunnar.
Hönnun verslunarinnar mun geyma sérkenni sem ekki hafa sést áður í verslunum Lindex hér á landi með samblandi af skandínavískum einfaldleika í bland við liti og lýsingu sem miða að því að skapa tískuupplifun á heimsmælikvarða.