Pokabuxurnar með endurkomu

Þröngar buxur hafa tröllriðið öllu lengi vel en nú virðist buxnatískan vera að taka u-beygju. Söngkonan Rihanna prýðir forsíðu nýjasta tölublaðs I-D og inni í blaðinu má þá finna flottan myndaþátt. Rihanna klæðist víðum gallabuxum í anda tíunda áratugarins á einni myndinni, myndaþátturinn er eitt af því sem gefur til kynna að tískan sé að breytast og víðar buxur komi sterkar inn.

Víðar buxur hafa þá verið áberandi á tískusýningum nokkurra helstu hönnuða heims undanfarið og einnig í tískuvöruverslunum. Þeir sem klæddust gjarnan pokabuxum um miðjan tíunda áratuginn geta nú tekið þessum ferska tískustraumi opnum örmum.