Til þess að fataskápurinn endist sem lengst er lykilatriði að fara vel með fötin í honum. Hér koma nokkur ráð frá Sandrine Vaillancourt um hvernig er best að fá fötin til þess að endast.
Kauptu föt úr góðum efnum
Fyrsta skrefið í því að fá fataskápinn til þess að endast er að kaupa föt úr gæðaefnum. Kauptu föt úr góðum efnum sem þú getur verið viss um að eyðileggist ekki eftir fyrsta þvott. Það er vel þess virði að eyða stundum aðeins meira í betri gæði því þau föt endast lengur.
Geymdu þau rétt
Geymslan á fötunum skiptir einnig miklu máli og hefur áhrif á það hversu lengi þau endast. Ef þú passar upp á að geyma þau rétt haldast þau rétt í laginu. Ekki hengja til dæmis peysur og stuttermaboli á herðatré, það er betra að brjóta þau saman og geyma ofan í skúffu. Þá getur einnig verið sniðugt að setja plastpoka eða pappír ofan í skó þannig að lagið á þeim haldist.
Lestu þvottaleiðbeiningarnar
Til þess að forðast allan misskilning er best að lesa vel allar þvottaleiðbeiningar sem fylgja fötunum. Ef þú ert í einhverjum vafa er alltaf gott að handþvo og leyfa hlutunum að þorna sjálfum.
Gerðu við
Ef fötin eru skemmd er oft tiltölulega ódýrt að fara með þau í viðgerð. Ef þú kannt ekki að laga þetta sjálf/ur getur þú alltaf kíkt til klæðskera sem ætti að geta bjargað málunum. Oft er ódýrara að gera við gömlu flíkina heldur en að kaupa nýja.