Tískuveldið NTC sem rekur Gallerí Sautján, Kultur, GS skó og fleiri verslanir fagnar 40 ára afmæli í október. Allar verslanir NTC verða með í hátíðarhöldunum en hápunkturinn verður afmælisdagskrá í versluninni Gallerí Sautján í Kringlunni þar sem gínur verða klæddar upp í mest seldu flíkur fyrirtækisins frá upphafi.
„Við erum að leita að „best sellerum“ í gegnum tíðina. Við erum búnar að hafa samband við gamalt starfsfólk og höfum fengið mjög góð viðbrögð,“ segir María Einarsdóttir, verkefnastjóri NTC, í samtali við Smartland. Það er þó ýmislegt sem vantar upp á og segir María að þau séu að leita að Tark-buxum, Punk Royal-buxum og Claudie Zana-drögtum svo eitthvað sé nefnt.
„Við höfum fengið til dæmis Mao-jakkaföt, Mao-kápu, Henson-peysu, Diesel-buxur og Ghoast-kúrekastígvél svo eitthvað sé nefnt. Uppi á skristofu er búið að ramma inn best-sellera í gegnum tíðina og verða þær flýkur til sýnis. Auk þess höfum við verið að leita að fötum á Facebook,“ segir María.
Í tilefni af 40 ára afmælinu var Galleri Sautján í Kringlunni endurhönnuð og verður mikið húllumhæ í búðinni meðan á afmælisvikunni stendur. Ef þú lumar á góssi frá gamalli tíð úr 17 eða fleiri verslunum getur þú haft samband hér.