Árið sem senn líður undir lok hefur verið sérlega grimmilegt, enda hefur það hrifið með sér margar af helstu stjörnum samtímans.
Tískuritið Vogue tók saman lista yfir helstu tískufyrirmyndirnar sem kvöddu árið 2016.
Prince
Tónlistarmaðurinn Prince var sérlega áhrifamikill í tískunni. Hann var þekktur fyrir skrautlegan stíl sem gerði mörkin á milli kven- og karlfatnaðar óskýr. Þá klæddist hann gjarnan þröngum buxum, víðum blússum og háhæluðum skóm. Fjólublái liturinn var einnig afar áberandi.
David Bowie
Stíll David Bowie var oft á tíðum afar skrautlegur, sem og fjölbreytilegur. Í gegnum tíðina tók fatastíll og tískuvitund Bowies miklum breytingum í takt við tónlist hans. Flestir muna til að mynda eftir Ziggy Stardust-múnderingunum og förðuninni. Á sínum tíma sást hann til að mynda í glimmersamfestingum og þykkbotna skóm.
Leonard Cohen
Stíll hins kanadíska Leonard Cohen var talsvert frábrugðinn stíl ofangreindra tónlistarmanna. Hann var ávallt vel til hafður og var þekktur fyrir að ganga í rúllukragabolum, snyrtilegum frökkum og með hatt.
Zsa Zsa Gabor
Ef það var ekki fegurð og vitsmunir leikkonunnar sem héldu aðdáendum, sem og átta eiginmönnum, við efnið var það svo sannarlega smekkur hennar fyrir fögrum og vönduðum munum. Þá var leikkonan sérlega hrifin af demöntum, loðfeldum og sérsaumuðum hátískufatnaði. Ekki er ólíklegt að ofurdívan Mariah Carey og Paris Hilton hafi sótt innblástur til Gabor.
China Machado
China Machado var fyrsta litaða fyrirsætan til að prýða forsíðu bandarísks tískurits, en hún var að kínverskum, portúgölskum og indverskum ættum. Machado veitti fjölmörgum tískuhönnuðum innblástur, svo sem Hubert de Givenchy og Christian Dior. Þess að auki var hún góðvinkona Pablo Picasso og Andy Warhol.
Muhammad Ali
Ali sást gjarnan fáklæddur inni í hringnum, en utan hans var hann gjarnan ákaflega vel klæddur. Ali var ekki yfir það hafinn að ganga í áberandi loðkápum, en hann var einnig hrifinn af jakkafötum og fallegum höttum.