Stal senunni á rauða dreglinum

People’s Choice Awards fóru fram í Microsoft-leikhúsinu í Los Angeles í nótt og er óhætt að segja að öllu hafi verið til tjaldað.

Glæsileikinn á rauða dreglinum var mikill en óvænta ánægjan var sú að kvenkyns stjörnurnar klæddust kjólum af öllum gerðum, litum og sniðum. Mátti þá einnig sjá samfestinga og buxnadragtir.

Jennifer Lopez, ókrýnd drottning rauða dregilsins olli engum vonbrigðum með kjólavali sínu í gær en hún klæddist guðdómlegum svörtum kjól sem fór henni einstaklega vel. Eins og sjá má á meðfylgjandi myndum var kjóllinn einnig skreyttur demöntum, sem og hún sjálf.

Lopez stal ekki bara senunni á dreglinum heldur vann hún sín fyrstu People’s Choice-verðlaun en hún hlaut þau fyrir hlutverk sitt í þáttunum Shades of Blue. Hélt leik- og söngkonan einlæga ræðu og þakkaði spænskum aðdáendum sínum sérstaklega.