Heitasti fylgihlutinn í dag er ekki handtaska heldur símahulstur. Snjallsími er orðinn óaðskiljanlegur hlutur fyrir mannfólkið og því er ekki furða að hátískuhönnuðir hanni sérstök símahulstur.
Guardian greinir frá því að að Nicolas Ghesquière hafi hannað símahulstur fyrir vor- og sumarlínu Louis Vuitton 2017 í gamla góða Louis Vuitton-stílnum. Á tískusýningunni í París gekk fyrsta fyrirsætan inn með síma í Louis Vuitton-símahulstri í stað handtösku.
Fólk er í símanum alls staðar og hulstrið því mjög sýnilegt, sérstaklega þar sem fólk notar skjáinn mun meira en símtólið. Speglasjálfsmyndir eru einnig vinsælar og þar með mikilvægt að vera með flott hulstur.