Pippa skellti sér út á lífið í fokdýrum kjól

Pippa Middleton, systir hertogaynjunnar af Cambridge, er í óða önn að skipuleggja brúðkaup sitt sem fram fer á næstunni. Hún gaf sér þó tíma til að skella sér út á lífið á dögunum, og klæddist að sjálfsögðu kjól í fínna laginu.

Fyrir valinu varð blár kjóll úr smiðju Erdem, en kjóllinn er skreyttur forláta kristöllum eins og fram kemur í frétt Telegraph. Margar konur geta einungis látið sig dreyma um að eignast slíka flík, enda kostar kjóllinn 1.735 sterlingspund sem samsvarar tæpum 240 þúsund íslenskum krónum.

Middleton og unnusti hennar, James Matthews, ætla að ganga í það heilaga síðar í mánuðinum, nánar tiltekið 20. maí.

Pippa klæddist kjól úr smiðju Erdem. Skjáskot / The Guardian

Pippa vakti mikla athygli þegar hún var brúðarmær í hinu konunglega brúðkaupi á sínum tíma. Ljósmynd / skjáskot Daily Mail

• Blogga um frétt