Hrefna Daníelsdóttir, eða Hrefna Dan eins og hún er jafnan kölluð, heldur úti vinsælu bloggi, sem og Instagram-reikningi. Blaðamaður fór á stúfana og spurði Hrefnu hver galdurinn á bak við skemmtilegt og persónulegt blogg væri. Þá var auðvitað ekki úr vegi að forvitnast aðeins um sumartískuna og annað í þeim dúr.
„Galdurinn er aðallega fólginn í því að skrifa um hluti sem þú hefur áhuga á og það er alls ekki verra að vera aðeins á persónulegu nótunum.“
Hvers konar færslur fá best viðbrögð?
„Þessa dagana eru það færslur tengdar húsinu okkar, sem við vorum að kaupa og gera upp.“
Hver er galdurinn á bak við verulega frábæra Instagram-mynd?
„Það er allavega ekki filter...“
Þú ert mikill fagurkeri, hverju ert þú spenntust fyrir að klæðast í sumar?
„Léttum maxi-kjólum og góða skapinu.“
Hvað er algerlega ómissandi í fataskápinn um þessar mundir?
„Það er ekkert ómissandi í fataskápinn, en með hækkandi sól er ekki verra að taka fram léttari flíkur og vona að veðurguðirnir verði góðir við okkur í sumar.“
Hvar finnst þér skemmtilegast að versla?
„Ég hef mest gaman af því að kíkja á antikmarkað sem er hérna í næsta nágrenni við mig og Búkollu, nytjamarkað sem einnig er hérna á Akranesi. Ég hef gert mörg af mínum allra bestu kaupum á þessum mörkuðum.“
Hvað með snyrtibudduna, breytist förðunin hjá þér þegar sól tekur að hækka á lofti?
„Ég farða mig aldrei mikið, sama hvernig veðrið er.“
Hvaða snyrtivara þykir þér ómissandi?
„Varalitur er mín uppáhaldssnyrtivara. Ótrúlegt hvað fallegur varalitur getur hresst mikið upp á lúið andlit.“
Hvaða hárvöru gætir þú ekki verið án?
„Þurrsjampós. Ég þvæ hárið á mér aldrei oftar en tvisvar í viku, og því er þurrsjampó algjört möst.“
Hvað ætlar þú að gera skemmtilegt í sumar?
„Þetta klassíska, ferðast, njóta, fá nokkrar freknur á nefið, verja sem mestum tíma með fólkinu mínu og drekka kannski nokkra svalandi kokteila.“