Um fátt annað hefur verið talað um síðustu tvo daga en svokallaða H&M kassa sem margir íslenskir áhrifavaldar fengu í pósti. En í kassanum var boðskort í opnunarpartí H&M á Íslandi sem veitir meðal annars 20% afslátt í versluninni þennan dag.
Leikarinn Jóhannes Haukur Jóhannsson greindi frá því að Facebook að hann hafði fengið boðskassa en hann vill koma í veg fyrir þann misskilning að honum hafi ekki verið boðið í opnunina.
„Ástæðan fyrir því að ég hef ekki birt myndir af mér og boðskassanum er einföld. Ég er ekki á landinu heldur er ég staddur í London (að vinna við alþjóðlegt sjónvarpsverkefni með mjög frægum leikurum sem er leyndó að sjálfsögðu),“ skrifar Jóhannes Haukur á Facebook.
Konan hans er hinsvegar á Íslandi og hefur staðfest það að hann hafi að sjálfsögðu fengið boðskassa eins og margir aðrir lífstílsbloggarar og áhrifafólk.
Fréttir bárust af því í gær, miðvikudag að svokallaðir áhrifavaldar á netinu hafi fengið boðskort í opnunarpartíið en svo virðist sem vinsælir leikarar hafi líka fengið boð. En auk Jóhannes Hauks á félagi hans Ólafur Darri Ólafsson líka að hafa fengið boðskassa.
Smartland bíður að sjálfsögðu spennt eftir opnun H&M en skilur hinsvegar ekki af hverju stærsti lífstílsvefur á Íslandi hefur ekki fengið boðskassa. Spurning hvort að pósturinn sé lengur á leiðinni upp í Hádegismóa?