Lífstílsbloggarinn Lína Birgitta Camilla Sigurðardóttir er ein af þeim útvöldu sem var boðið í opnunarpartý H&M sem verður í Smáralindinni í kvöld. Lína segist ætla að sjálfsögðu að mæta þar sem hún hefur beðið lengi eftir opnun sænsku verslunarkeðjunnar hér á klakanum.
„Ég er mega peppuð,“ sagði Lína í samtali við Smartland en hún ætlar að taka Andreu vinkonu sína með sér en í boðskortinu er leyfilegt að taka með sér gest.
„Við ætlum að fara út að borða eftir þetta og gera bara dag úr þessu,“ segir hún og hlær.
Í veislunni ætlar Lína að reyna að finna sér góðan loðjakka fyrir veturinn en það mun vera 20 prósenta afsláttur af öllum vörum í búðinni meðan á opnunarpartýinu stendur.
Lína býst við því að þessi H&M-búð verði með þeim flottustu í heiminum þar sem hún er glæný og á Íslandi sem er svo vinsæll ferðamannastaður eins og er.
„Ég er búin að heyra frá þeim sem eru að smíða þarna inni að þetta sé alveg klikkaðslega flott. Ég býst við að þetta líti fáránlega vel út og krosslegg fingur um að það séu flottar vörur þarna inni.“
Hún heldur samt að ekki mikið muni breytast við komu H&M til landsins nema það að H&M verður ekki lengur á forgangslistanum hennar þegar hún fer utan að versla þar sem hún getur nú alltaf kíkt þangað inn. Hún bætir við að fólkið sem hefur áhyggjur af því að allir Íslendingar verði eins vegna komu H&M þurfi ekki að hafa neinar áhyggjur þar sem Íslendingar klæða sig hvort eð er allir eins.
„Íslendingar eru bara svolítið svoleiðis, um leið og það kemur eitthvað nýtt þá byrja allir að vera í því.“