Kínóa á húðina, ekki bara í magann

Kínóa hefur verið vinsælt í hollustufræðunum undanfarin ár og nú hefur fólk tekið upp á því að næra ekki bara líkamann með kínóa heldur einnig húðina. 

Sonia Batra, aðstoðarprófessor í húðsjúkdómafræðum, segir í grein Prevention um málið að fólk viti hversu mikil súperfæða kínóa er og því hafi það viljað prófa sig áfram með fæðuna. Hún segir vísindin styðja þær hugmyndir fólks að kínóa sé gott á húðina. 

Hvernig í ósköpunum á maður að nota frætegundina sem er oft notuð í stað hrísgrjóna á húðina? Jú, það er til dæmis hægt að nota kínóa til þess að endurnýja húðina. Kínóa er nógu hart til þess fjarlægja dauða húð en nógu mjúkt til þess að skaða húðina ekki.

Hægt er að blanda saman elduðu kínóa við til dæmis ólífuolíu. Síðan má nudda formúlunni á húðina og hreinsa af með vatni.