Klæddi sig óviðeigandi á kryddpíuárunum

Victoria Beckham viðurkennir það í viðtali við desemberútgáfu breska Vogue að hún hafi klætt sig óviðeigandi þegar hún starfaði með kryddpíunum sem fína kryddið. Fatastíll söngkonunnar hefur tekið töluverðum breytingum síðan þá. 

„Var ég með permanent sem var pínu ógeðfellt? Já. Klæddist ég skrítnum gallabuxum? Já,“ segir fatahönnuðurinn og fyrrverandi kryddpían um fatastíl unglingsáranna samkvæmt Daily Mail.

Hún segist hins vegar ekki hafa kætt sig óviðeigandi fyrr en hún byrjaði í Kryddpíunum. „Mamma mín hefði aldrei leyft mér að klæða mig svona,“ sagði Beckham í viðtalinu.  

Fína kryddið var þekkt fyrir að klæðast þröngum og efnislitlum kjólum. Þrátt fyrir að fína kryddið hafi oft verið í stystu kjólunum klæddust allar kryddpíurnar efnislitlum fötum. Frú Beckham hefur áður sagt að þær hafi lítið út eins og karlmenn í dragi á tónlistarverðlaunahátíð seint á tíunda áratugnum vegna mikils farða.  

Beckham hefur breytt um stíl á síðustu tveimur áratugum og stjórnar nú tískuveldinu Victoria Beckham. Nú sést hún varla í flegnu og á mikið af síðum buxum, síðum pilsum og skyrtum.