Katrín hertogaynja klæddist hlýrri vetrarkápu frá einu af sínum uppáhaldsmerkjum, L.K. Bennett, þegar hún og Vilhjálmur Bretaprins heimsóttu Manchester á dögunum. Vilhjálmur var bara í jakkafötum og því ekki eins vel klæddur.
Hertogaynjan klæðist oft fötum frá íslenskættaða merkinu og kostaði þessi klassíska kápa 495 pund eða tæpar 70 þúsund íslenskar krónur. Undir kápunni var hún í stuttum rauðum kjól frá Goat en hertogaynjan hefur mikið sést í fötum með merkinu eftir að hún varð ólétt.
Um leið og þykkar dúnúlpur eru að verða sífellt vinsælli eru síðar vetrarkápur vinsælar hjá þeim í kóngafjölskyldunni en í síðustu viku klæddist verðandi svilkona Katrínar, Meghan Markle, síðri svartri vetrarkápu.