Klesst augnahár eru nýjasta tískan í augnförðun. mbl.is/Cover Media

Hingað til hefur það þótt merki um lélegar snyrtivörur og hroðvirknisleg vinnubrögð að ganga um með þykkt lag af maskara og augnahárin öll í flækju en ekki lengur. Klesst augnahár eru komin í tísku.

Flottast þykir að hafa augnahárin löng og maka á þau þykku lagi af  maskara, þannig að hárin flækist saman og minni helst á slys.

Hönnuðirnir MaxMara og Alberta Ferretti eru í hópi þeirra fjölmörgu sem fallið hafa fyrir nýja útlitinu og birtast fyrirsætur nú á tískuljósmyndum þeirra með klessumaskara.

Aðferðin: Notaðu augnahárabrettara til að bretta augnahárin upp eins mikið og mögulegt er. Veldu þvínæst maskara með stærsta bursta sem þú finnur. Berðu svo maskarann á augnahárin aftur og aftur og láttu þorna á milli, þar til komið er þykkt lag. Mundu að bursta hárin vel og vandlega upp og niður og til hliðanna á milli laga, þannig að þau klessist rækilega.