Bergljót Friðriksdóttir beggo@mbl.is

Eva Longoria er enn með húðflúr tileinkað fyrrverandi eiginmanninum, körfuboltakappanum Tony Parker. Húðflúrið fer mjög í taugarnar á nýja kærastanum Eduardo Cruz og ætlar leikkonan nú að láta fjarlægja það með hjálp leysitækni, að því er fram kemur á vef þýska tímaritsins Spiegel.

Longoria skildi við Parker á síðasta ári eftir að sögusagnir komust á kreik um að hann hefði reynst henni ótrúr. Á meðan allt lék í lyndi lét leikkonan húðflúra leikmannatölu Parkers, Nine, aftan á hálsinn og á hægri úlnlið lét hún húðflúra brúðkaupsdaginn þeirra 7. júlí 2007 með rómverskum tölum, VII VII MMVII.

Eftir skilnaðinn skrifaði Longoria twittervinum sínum að hún væri enn með gamla húðflúrið en nú virðist hún vera komin á þá skoðun að best sé að losa sig við það, enda nýi kærastinn, sem er bróðir leikkonunnar Penelope Cruz, mjög óhress.