Jennifer Aniston fer seint á spjöld sögunnar fyrir síbreytilegt útlit. Hún hefur skartað sömu hárgreiðslunni frá því að hún sló í gegn í þáttaröðinni vinsælu Friends og birtist iðulega á rauða dreglinum klædd látlausum, svörtum, stuttum kjól. Nú finnst henni þó kominn tími til að breyta um útlit, skapa sér nýjan stíl og skipta um háralit.

Í viðtali við bandaríska tímaritið InStyle viðurkennir leikkonan fúslega að hún sé alltaf eins til fara á kvikmyndaverðlaunahátíðum með sína síðu ljósu lokka og í svörtum kjól.

„Það er kominn tími til að ég breyti útlitinu og klæðist einhverju öðru á rauða dreglinum,“ segir Aniston. „Ég hef kosið að fara öruggu leiðina í klæðaburði til að tryggja að mér líði vel og hef hárið alltaf eins. En nú langar mig til að breyta til, finna mér nýjan fatastíl og jafnvel láta dekkja hárið.“