Notar svita til að móta hárið

Leikkonan Jennifer Aniston er ekkert að stressa sig á að fara í sturtu til að þvo hárið eftir ræktina því hún segir svita nýtast vel til að móta hárið eins og um hárvöru sé að ræða.

„Nei, ég geri það ekki. Í alvörunni. Smásviti í hárið gerir það bara flott. Hann virkar eins og hárvara. Maður blæs bara hárið og það kemur vel út,“ sagði Aniston aðspurð hvort hún skolaði alltaf á sér hárið eftir ræktina.

Aniston notar sérstakt sjampó án sílikons frá merkinu Living Proof og þvær hárið á tveggja til þriggja daga fresti. „Sílikon er mesti skemmdarvargurinn í flestum sjampóum. Það safnast upp á hárinu með tímanum og gerir hárið hart þannig að það brotnar,“ sagði Aniston í viðtali við Fashionista magazine.

„Fólk var alltaf að segja: „Ekki þvo hárið á þér á hverjum degi.“ En það var ómögulegt vegna sílikonsins og olíunnar, þetta skapaði fituslikju á hárinu á innan við einum degi,“ útskýrði Aniston sem er hluthafi í Living Proof.

Jennifer Aniston notar sjampó frá Living Proof.

• Blogga um frétt