Ertu þreytt og þrútin og húðin kannski ekki upp á sitt besta. Þá gæti kókosvatn verið svarið, í það minnsta ef marka má orð ofurfyrirsætunnar Adriana Lima.
Lima greindi frá því í viðtali við New York Magazine á dögunum að lykillinn að fallegri húð hennar sé ekki fólgin í því að smyrja rándýrum smyrslum, eða kostnaðarsömum andlitskremum framan í sig.
Lima, sem hefur lifibrauð sitt af því að líta vel út, segir þvert á móti að náttúrulegar vörur séu í uppáhaldi.
Þegar fyrirsætan var spurð að því hvort hún byggi yfir einhverju fegurðarráði sagði hún þetta allt vera í vatninu. Kókosvatninu nánar til tekið.
Fyrirsætan bæði drekkur vatnið, og notar það útvortis. Þegar hún er þreytt og þrútin finnst henni nefnilega fátt betra en að væta bómullarhnoðra með kókosvatni og strjúka eftir andliti sínu. En vökvinn er stútfullur af vítamínum og öðru góðgæti sem gott er fyrir húðina.
Kókosvatn hefur verið mikið í umræðunni undanfarið, enda bráðhollt. Það er talið geta dregið úr timburmönnum, hjálpað til við meltingu, lækkað blóðþrýsting og svo mætti lengi telja. Hingað til hefur þó mestmegnis verið einblínt á kosti þess að innbyrða drykkinn. Það ætti þó ekki að saka að skvetta svolitlu kókosvatni framan í sig, sér í lagi ef ein fegursta kona heims gerir það að staðaldri.