Fyrirsætan Breanna Rice greindist með sjaldgæfan húðsjúkdóm þegar hún var nítján ára gömul. Í andliti Rice eru nokkrir skjallblettir en þeir orsakast af því að líkaminn ræðst á litafrumurnar í líkamanum og skilur eftir þessa litarefnalausu bletti.
Í tíu ár hefur Rice falið blettina með alls kyns förðunarvörum fyrir öllum nema foreldrum sínum. Á endanum fékk fyrirsætan þó nóg af þessum feluleik og ákvað að opna sig um baráttuna við sjúkdóminn í von um að veita öðrum styrk og hvetja fólk til þess að vera ánægt með sjálft sig, hvernig sem það lítur út.
Myndirnar án farða birti Rice á Instagram-síðu sinni.