Urban Decay greindi frá því að von væri á nýrri Naked-augnskuggapallettu og skemmst er frá því að segja að netið hafi farið á hliðina.
Augnskuggarnir hafa notið gríðarlegra vinsælda hjá förðunarfræðingum, sem og skvísum almennt, og því voru tíðindin mörgum mikið gleðiefni.
Urban Decay greindi frá fréttunum á Instagram-síðu sinni, þar sem sjá má myndir af nýju augnskuggunum sem fáanlegir verða vestanhafs frá 18. september næstkomandi.
„Við kynnum til leiks nýjasta fjölskyldumeðliminn í Naked-línunni. Naked Ultimate Basics,“ segir í færslunni sem halaði inn þúsundum „læka“ á núll einni.
Þá greindi fyrirtækið einnig frá því að með nýju augnskuggunum væri það að koma til móts við aðdáendur sem hefðu gjarnan viljað fá matta augnskugga í safnið.
„Þegar við segjum að við hlustum á ykkur meinum við það. UD-fíklar hafa verið að grátbiðja okkur um fleiri matta augnskugga á samfélagsmiðlum, og við létum verða af því.“