Öruggur sigur hjá Loeb

Sébastien Loeb á keppnisbíl sínum. LEHTIKUVA

Frakkinn Sébastien Loeb vann öruggan sigur í Þýskalandsrallinu, sem lauk í dag. Var Loeb, sem er sexfaldur heimsmeistari í rallakstri, 51,3 sekúndum á undan Spánverjanum Dani Sordo en þeir aka báðir Citroën C4. Þriðji varð Frakkinn Sébastien Ogier, sem einnig ekur Citroën, en hann var 2,13 mínútum á eftir landa sínum.

Í næstu sætum voru Finninn Jari-Matti Latvala, Norðmaðurinnn Petter Solberg, Bretinn Matthew Wilson, Finninn Kimi Räikkönen og Khalid Al Qassimi frá Sameinuðu arabísku furstadæmunum.

Loeb hefur nú 191 stig í stigakeppni ökumanna, Ogier 133, Latvala 117 og Solberg 100.