Loeb með forustu í Frakklandi

Keppendur í Frakklandsrallinu í dag. Reuters

Franski heimsmeistarinn í rallakstri, Sébastien Loeb, er með forustu eftir fyrsta keppnisdag í Frakklandsrallinu, sem fer fram í nágrenni Strassborgar um helgina. Loeb, sem varð heimsmeistari undanfarin sex ár, stefnir á sjöunda titilinn í ár. 

Loeb náði besta tímanum á fjórum fyrstu sérleiðunum og er með 22,7 sekúndna forskot á Spánverjann Dani Sordo og 25,6 sekúndna forskot á Frakkann Sébastien Ogier. Allir aka þeir Citroën C4. Finninn Jari-Matti Latvala er fjórði í keppninni.