Ogier vann í Grikklandi

Frakkinn Sébastien Ogier fór með sigur af hólmi í Akropólisrallinu í Grikklandi í dag en landi hans og liðsfélagi, Sébastien Loeb, varð annar 10,5 sekúndum á eftir. Finninn Mikko Hirvonen varð þriðji, 13,5 sekúndum á eftir Ogier.

Loeb hefur samt talsvert forskot í stigakeppni ökumanna og bendir allt til þess að hann hreppi sjöunda heimsmeistaratitil sinn á sjö árum. Hirvonen er í 2. sæti og Ogier í því þriðja.

Norðmaðurinn Petter Solberg, sem hafði forustu eftir fyrsta keppnisdaginn, endaði í 4. sæti og Henning bróðir hans í því fimmta. Í sjötta sæti varð Englendingurinn Matthew Wilson og Finninn Kimi Räikkönen varð sjöundi.