Hirvonen og Loeb saman hjá Citroën

Mikko Hirvonen.

Finnski rallökumaðurinn Mikko Hirvonen, sem undanfarin ár hefur ekið fyrir Ford í heimsmeistaramótinu í rallakstri, mun aka fyrir Citroën á næsta ári og leysa Frakkann Sébastien Ogier af hólmi.

Fyrir hjá Citroën er Frakkinn Sébastien Loeb, sem um helgina vann sinn áttunda heimsmeistaratitil í röð en Hirvonen hefur nú síðustu ár helst veitt Loeb keppni um heimsmeistaratitilinn og varð í öðru sæti nú. Vitað er, að samskipti Loebs og Ogiers hafa verið stirð á þessu ári. 

Jarmo Lehtinen verður áfram aðstoðarökumaður Hirvonens. Daniel Elena verður aðstoðarökumaður Loebs eins og hann hefur verið undanfarin ár.