Óskar Örn Hauksson: Hlýtur að hafa verið skemmtilegt fyrir áhorfendur

Þær hafa ekki verið ýkja margar þrennurnar í Pepsí deild karla í sumar en kantmaðurinn Óskar Örn Hauksson náði einni slíkri þegar KR sigraði Stjörnuna 7:3 í Frostaskjólinu í dag.

„Við svona aðstæður gerast oft óvæntir hlutir og það var gaman að spila þó svo að völlurinn væri svolítið þungur og erfiður. Þetta var ótrúlegt á tímabili þegar liðin fóru í sókn til skiptis og skoruðu. Þetta hlýtur að hafa verið skemmtilegt fyrir áhorfendur,“ sagði Óskar í samtali við mbl.is á KR-vellinum í dag.

Óskar sagði KR-inga hafa verið einbeitta fyrir leikinn enda áttu þeir þá enn fræðilega möguleika á því að verða Íslandsmeistarar: „Við ætluðum ekki að tapa þessum leik ef FH-ingar skyldu misstíga sig. Við höfðum það á bak við eyrað en úr því sem komið er þá stefnum við ótrauðir á annað sætið og ætlum að tryggja okkur það í síðustu umferðinni.“

• 1 blogg um fréttina

Bloggað um fréttina

• S. Lúther Gestsson: Rúllandi hamingja og gleði.