Viktor Bjarki samdi við KR til þriggja ára

Viktor Bjarki Arnarsson sækir að Finni Orra Margeirssyni. mbl.is

„Við erum ánægðir með að hafa fengið Viktor Bjarka í okkar raðir. Hann lék vel með okkur sumarið 2008 og hann styrkir liðið okkar,“ sagði Rúnar Kristinsson yfirmaður knattspyrnumála hjá bikarmeistaraliði KR við mbl.is í kvöld. Viktor Bjarki Arnarsson samdi við KR til þriggja ára en hann lék með Nybergsund í Noregi á síðustu leiktíð.  

Viktor Bjarki lék 18 leiki með KR sumarið 2008 þar sem hann skoraði eitt mark en hann var valinn besti leikmaður Íslandsmótsins af leikmönnum og þjálfurum haustið 2006 þegar  hann var leikmaður með Víkingi. Hann samdi við Lilleström haustið 2006 og var þar til ársins 2008 en KR-ingar fengu hann að láni sumarið 2008.