Andri með þrennu gegn FH-ingum

Andri Fannar Stefánsson skoraði þrisvar hjá FH-ingum í dag. mbl.is/Golli

Andri Fannar Stefánsson, 18 ára leikmaður KA, skoraði þrennu gegn Íslandsmeisturum FH í dag þegar liðin skildu jöfn í Boganum, 3:3. KA-menn voru samt manni færri í 70 mínútur, eftir að þjálfari liðsins, Dean Martin, var rekinn af velli fyrir að verja skot FH-inga með hendi á marklínu.

Andri kom KA yfir snemma en síðan kom rauða spjaldið á Dean og vítaspyrna í kjölfarið sem Gunnar Már Guðmundsson jafnaði úr fyrir FH. Pétur Viðarsson skoraði fyrir FH, 2:1, en Andri Fannar jafnaði, 2:2, fyrir hlé.

Atli Viðar Björnsson kom FH í 3:2 en tíu KA-menn gáfust ekki upp og Andri Fannar náði að jafna metin áður en yfir lauk.

FH tapaði þar með sínum fyrstu stigum og fékk á sig sín fyrstu mörk í 2. riðli A-deildar Lengjubikarsins en liðið er með 7 stig eftir þrjá leiki. KA-menn fengu hinsvegar sitt fyrsta stig í keppninni.