Björgólfur Takefusa næstur til að ná hundrað mörkum?

Björgólfur Takefusa leikur með Fylkismönnum á næsta tímabili í fótboltanum. Þeir hafa fengið hann lánaðan frá Víkingum í eitt ár í kjölfar þess að Fossvogsliðið féll úr Pepsi-deildinni í haust.

Björgólfur snýr þar með aftur í Árbæinn eftir sex ára fjarveru en hann spilaði með Fylkismönnum árin 2004 og 2005. Hann lék með þeim 28 leiki í deildinni og skoraði 13 mörk en gekk síðan til liðs við KR í framhaldi af því.

Björgólfur skoraði sjö mörk fyrir Víkinga í sumar og var þeirra markahæsti maður enda þótt hann missti af talsverðum hluta tímabilsins vegna meiðsla. Björgólfur hefur gefið til kynna að hann stefni á að leika í efstu deild næstu árin og þar með er hann líklegur til verða næsti leikmaðurinn, og aðeins sá fjórði í sögunni, sem nær að skora 100 mörk í efstu deild hér á landi.

Björgólfur hefur nú skorað 80 mörk í deildinni fyrir Reykjavíkurfélögin Þrótt, Fylki, KR og Víking. Hann er 31 árs, sex árum yngri en Tryggvi Guðmundsson, sem jafnaði markamet Inga Björns Albertssonar í sumar og hefur gert 126 mörk í deildinni.

Aðeins einn annar sem lék í deildinni í sumar hefur skorað fleiri mörk en Björgólfur. Það er Arnar Gunnlaugsson, sem hefur gert 82 mörk, en Arnar er orðinn 38 ára gamall.