Albert með þrennu í sigri FH

Albert Brynjar hefur raðað inn mörkum fyrir Fylki síðustu ár en er nú kominn til FH. mbl.is/Eggert

Albert Brynjar Ingason, sóknarmaðurinn sem gekk í raðir FH frá Fylki í vetur, skoraði þrennu í 5:0-sigri liðsins á Keflavík á Fótbolta.net-mótinu í dag. Öll mörkin komu á fyrsta hálftíma leiksins. Breiðablik og ÍA mættust einnig í dag og gerðu markalaust jafntefli.

Keflavík missti mann af velli strax á 4. mínútu þegar Ásgrímur Rúnarsson fékk rautt spjald og átti erfitt uppdráttar eftir það. Það varð þó aftur jafnt í liðum 20 mínútum fyrir leikslok þegar Emil Pálsson var rekinn af velli.

Breiðablik og ÍA hafa fjögur stig í A-riðli, FH er með þrjú stig og Keflavík ekkert.