Guðmundur til liðs við Hauka
Guðmundur Sævarsson í leik með FH gegn Stjörnunni. mbl.is/Sigurgeir Sigurðsson
Knattspyrnumaðurinn Guðmundur Sævarsson er genginn í raðir fyrstudeildarliðs Hauka. Guðmundur skrifaði í gær undir eins árs samning við Hafnarfjarðarliðið en samningur hans við FH rann út um áramótin.
Guðmundur er 34 ára gamall og hefur verið einn besti hægri bakvörður landsins mörg undanfarin ár. Hann hefur leikið stórt hlutverk í sigursælu liði FH síðasta áratuginn en Guðmundur hefur leikið allan sinn feril með FH-ingum og státar af fimm Íslandsmeistaratitlum með félaginu og tveimur bikarmeistaratitlum.
Hann hefur leikið samtals 165 leiki í efstu deild og í þeim skorað 15 mörk. Síðastliðið sumar lék Guðmundur 12 leiki FH-liðsins í Pepsi-deildinni og skoraði í þeim eitt mark.
Hjá Haukum hittir Guðmundur fyrir þjálfarann Ólaf Jóhannesson en bakvörðurinn knái lék undir stjórn Ólafs hjá FH í nokkur ár. Ólafur tók við þjálfun Haukaliðsins í vetur eftir að hafa stýrt íslenska landsliðinu síðustu fjögur árin.
