Stjarnan rauf einveldi Blika

Stjarnan er Faxaflóameistari 2012. mbl.is/Árni Sæberg

Stjarnan tryggði sér í gærkvöld sigur í Faxaflóamóti kvenna í knattspyrnu með því að sigra FH, 5:1, í uppgjöri tveggja efstu liðanna í Kórnum í Kópavogi.

Þar með er einveldi Breiðabliks í keppninni rofið en Kópavogsliðið hafði unnið hana í þau sjö skipti sem mótið hefur verið haldið, frá 2005.

Stjarnan fékk 12 stig, FH 6, Breiðablik er með 3 stig, ÍBV 3 og Afturelding ekkert en Blikar eiga eftir að mæta bæði ÍBV og Aftureldingu.

Harpa Þorsteinsdóttir skoraði þrennu fyrir Stjörnuna í gærkvöld og þær Anna Björk Kristjánsdóttir og Ásgerður Stefanía Baldursdóttir gerðu eitt mark hvor fyrir Íslandsmeistarana. Aldís Kara Lúðvíksdóttir skoraði fyrir FH.