Valskonur Reykjavíkurmeistarar (myndskeið)
Rakel Logadóttir skoraði eitt markanna. mbl.is/Golli
Valskonur urðu í kvöld Reykjavíkurmeistarar í knattspyrnu þegar þær sigruðu Þrótt, 5:0, í síðasta leik sínum í mótinu. Valur fékk þar með 12 stig í fjórum leikjum en Fylkir og Fjölnir eru bæði með 6 stig og mætast í lokaleik mótsins annað kvöld.
Svava Rós Guðmundsdóttir kom Val yfir á 19. mínútu með hörkuskoti og Laufey Björnsdóttir bætti við marki á 30. mínútu þegar hún lyfti boltanum laglega yfir markvörð Þróttar, 2:0.
Rakel Logadóttir skoraði þriðja markið á 64. mínútu þegar hún brunaði inní vítateiginn og lyfti boltanum uppundir þverslána, og Kristín Ýr Bjarnadóttir það fjórða úr vítaspyrnu á 84. mínútu. Þær Rakel og Kristín komu báðar inn á sem varamenn í hálfleik.
Laufey skoraði síðan sitt annað mark undir lok uppbótartímans, 5:0, með föstu skoti fyrir utan vítateig.
Leikurinn var sýndur beint á SportTV og á heimasíðu stöðvarinnar má nú sjá mörkin fimm.
