Mateja Zver verður ekki með Þór/KA

Mateja Zver í leik með Þór/KA á síðustu leiktíð. mbl.is/Skapti Hallgrímsson

Mateja Zver, knattspyrnukonan snjalla frá Slóveníu, sem leikið hefur með Þór/KA síðustu fjögur árin, mun ekki spila með norðanliðinu á komandi leiktíð. Unnsteinn Einar Jónsson, formaður félagsins, staðfesti þetta í samtali við Morgunblaðið í gærkvöld.

Zver, sem er fyrirliði slóvenska landsliðsins, ætlar að taka sér frí frá fótbolta í sumar en hún hefur spilað allt árið síðustu árin, með liði frá heimalandi yfir vetrartímann og Þór/KA á sumrin.

Þetta er mikil blóðtaka fyrir Akureyrarliðið enda hefur Zver spilað stórt hlutverk með liðinu frá því hún kom til þess árið 2008. Hún skoraði níu mörk í 18 leikjum með Þór/KA í Pepsi-deildinni á síðustu leiktíð en alls hefur hún skorað 55 mörk í 63 leikjum með liðinu. Þá lagði Zver upp langflestu mörkin í Pepsi-deildinni í fyrra. Hún átti 19 stoðsendingar fyrir liðið og lagði því upp 19 af 39 mörkum liðsins.

Þór/KA hefur þar með misst tvo af sínum sterkustu sóknarmönnum en Rakel Hönnudóttir, sem hefur skorað 74 mörk í 100 leikjum með liðinu í efstu deild, gekk til liðs við Breiðablik í vetur.

Þór/KA hefur á móti fengið landsliðskonuna Katrínu Ásbjörnsdóttur frá KR, Þórhildi Ólafsdóttur frá ÍBV og Chantel Nicole Jones, sem er markvörður, frá Bandaríkjunum en hún leysir Berglindi Magnúsdóttur af hólmi.