Fram lagði Íslands- og bikarmeistara KR

Þorsteinn Már Ragnarsson úr KR og Alan Lowing úr Fram eigast við í leiknum í kvöld. mbl.is/Ómar

Gott gengi karlaliðs Fram í knattspyrnu heldur áfram en Framarar báru í kvöld sigurorð af Íslands- og bikarmeisturum KR þegar liðin áttust við í Lengjubikarnum í Egilshöllinni.

Samuel Hewson kom Fram yfir á 29. mínútu en mínútu síðar jafnaði Kjartan Henry Finnbogason metin fyrir KR-inga. Hinn eldfljóti Kristinn Ingi Halldórsson skoraði sigurmark Framara á 69. mínútu. Hann náði frákasti eftir að Fjalar Þorgeirsson hafði varið skot frá Steven Lennon.

Framarar hafa þar með unnið báða leiki sína, en þetta var fyrsti leikur KR-inga í mótinu.