Gylfi Þór: Mikill og óvæntur heiður

„Þetta er mikill og óvæntur heiður fyrir mig. Mér þykir vænt um að hljóta þessa viðurkenningu,“ sagði Gylfi Þór Sigurðsson, íþróttamaður ársins 2013, þegar mbl.is sló á þráðinn til hans í kvöld eftir að upplýst var um kjörið í hófi Samtaka íþróttfréttamanna í Gullhömrum.

„Ég bjóst ekki við við að verða valinn þótt gengi íslenska landsliðsins hafi verið frábært á þessu ári. Við vorum stutt frá því að takast hið ómögulega, það er að komast á lokakeppni HM. En það stóðu margir íþróttamenn sig afar vel á þessu ári, meðal annars Aníta Hinriksdóttir. Hún er ung á framtíðina fyrir. Sannast sagna þá átti ég von á að einhver annar en ég yrði fyrir valinu að þessu sinni,“ sagði Gylfi.

„Þetta ár hefur verið gott. Ég hef leikið meira en ég gerði tímabilið á undan. Mér persónulega hefur vegnað vel, bæði með félagsliði mínu og landsliðinu. Þegar ég lit til baka hefur árið í heild verið mjög gott,“ sagði Gylfi sem taldi þó kannski ekki að um væri að ræða sitt besta ár á ferlinum til þessa.
„Mér gekk einnig afar vel síðasta árið mitt með Reading áður en ég gekk til liðs við Hoffenheim í Þýskalandi.  En kannski er ég of gagnrýninn á sjálfan mig,“ sagði Gylfi glaðbeittur og bætti við að þá hefði hann verið yngri, leikið í veikari deild á Englandi og verið í 21 árs landsliðinu.

Varðandi komandi ár sagðist Gylfi líta björtum augum fram á veginn, bæði á vettvangi enska liðsins Tottenham og með íslenska landsliðinu en næsta haust hefst undankeppni Evrópumótsins.

Ítarlega verður rætt við Gylfa Þór í íþróttablaði Morgunblaðsins sem kemur út á mánudaginn.

• Blogga um frétt