Sterkur 3:2-útisigur Stjörnunnar á KR í gærkvöld setur baráttuna um Íslandsmeistaratitilinn þetta árið upp í einvígi milli FH sem er á toppnum með 41 stig eftir 17 leiki og Stjörnunnar sem hefur 39 stig eftir jafnmarga leiki, meðan KR-ingar sitja eftir í 3. sætinu með 32 stig og geta nánast gleymt því að verja titilinn sem liðið vann í fyrra.
Stjörnumenn lentu á Keflavíkurflugvelli klukkan fimm í fyrrakvöld eftir að skemmtilegu Evrópuævintýri þeirra lauk í Mílanó á fimmtudag. Einhverjir gætu hafa haldið að spennufallið eftir þá för yrði of mikið og leikurinn gegn KR yrði erfiður, því að auki voru Danirnir Niclas Vemmelund og Martin Rauschenberg í leikbanni og Jóhann Laxdal meiddur.
Stjarnan þurfti því að gera tilfæringar í vörninni. Hörður Árnason sem hefur leikið sem vinstri bakvörður í allt sumar lék með Daníel Laxdal í miðri vörninni, miðjumaðurinn Heiðar Ægisson lék sem hægri bakvörður og miðjumaðurinn Pablo Punyed sem vinstri bakvörður. Pablo og Heiðar leystu báðir sín hlutverk vel og Pablo átti líka tvær stoðsendingar í leiknum.
Nánari umfjöllun má finna í átta síðna íþróttablaði Morgunblaðsins í dag.